Հիպոթիրեոզ. armeniamedicalcenter.am

Բազմաթիվ մարդիկ ամեն օր ունենում են թուլություն, քնկոտություն, աշխատունակության անկում, վատ տրամադրություն, բայց ուշադրություն չեն դարձնում այդ ամենին:

Մինչդեռ այդ ախտանիշները կարող են հիպոթիրեոզի արտահայտություններ լինել:

Հիպոթիրեոզը հիվանդություն է, որն առաջանում է օրգանիզմում վահանաձև գեղձի հորմոնների անբավարարության հետևանքով: Այս ախտաբանության ժամանակ մարդկանց առանձնապես ոչինչ չի անհանգստացնում, բայց կյանքն անցնում է կողքով, ոչինչ չի ուրախացնում և բավարարվածություն չեն ստանում: Կարծես մարդը հոգնել է ամեն ինչից և տառապում է դրանից, բայց չի կարողանում հասկանալ, թե ինչ է իր հետ կատարվում: Կյանքը կորցնում է գույները, դառնում անգույն: Եթե այդ փուլում ժամանակին չբացահայտվի հիվանդությունը և բուժում չանցկացվի, ապա հիպոթիրեոզը կարող է լուրջ հետևանքներ ունենալ:

Երեխաների մոտ դա արտահայտվում է

• մտավոր և ֆիզիկական թերզարգացմամբ` ընդհուպ մինչև կրետինիզմ,
• սրտի հետ կապված խնդիրներով,
• իմունիտետի իջեցմամբ, որը կարող է քրոնիկ վարակների պատճառ դառնալ:

Մեծահասակների մոտ

• ինտելեկտի և հիշողության նվազում,
• սրտի կողմից խնդիրներ,
• արյան ճնշման կայուն իջեցում,
• իմունիտետի իջեցում,
• իմպոտենցիա և անպտղություն:

Հիպոթիրեոզը կարող է ի հայտ գալ բազմաթիվ պատճառներից: Կախված առաջացման պատճառներից և հվանդության փուլից, նշանակվում է համապատասխան բուժում:

Հիվանդության պատճառը և փուլը որոշելու համար անհրաժեշտ է կատարել համապատասխան հետազոտություններ, որոնց մեջ մտնում են նաև վահանագեղձի ֆունկցիոնալ և օրգանական խանգարումների դեպքում նշանակվող անհրաժեշտ հետազոտությունները:

Եթե առկա են հետևյալ ախտանիշները.

• քաշի կտրուկ ավելացում,
• հոգնածություն, քնկոտություն,
• հիշողության և ինտելեկտի նվազում,
• մշտական տրամադրության անկում,
• կանանց մոտ դաշտանային ցիկլի խանգարումներ,
• մաշկի չորություն և թեփոտում,
• մազաթափություն, մազերի փխրունություն և փայլի կորուստ,
• փորկապություն,

անհրաժեշտ է առանց հետաձգելու իրականացնել անհրաժեշտ հետազոտությունները (հորմոնալ ֆոնը, վահանաձև գեղձի ուլտրաձայնային հետազոտություն` հայտնաբերելու գեղձի ֆունկցիոնալ և օրգանական խանգարումները) և ստանալ համապատասխան բուժում: Բուժումից հետո կյանքը նորից կգունավորվի և կդառնա հաճելի ու հետաքրքիր:

Հարցեր, պատասխաններ, մեկնաբանություններ